ថៃ្ងទី១៨ ខែសីហា ឆ្នាំ២០០៨

ព្រះមហាក្សត្រនឹងយាងជាព្រះអធិបតីបើកសម័យប្រជុំសភានីតិកាលទី ៤

ព្រះមហាក្សត្រនៃព្រះរាជាណាចក្រកម្ពុជា ព្រះករុណាសម្តេចព្រះ នរោត្តម សីហមុនី ព្រះអង្គនឹងដឹកនាំពិធីបើកសម័យប្រជុំ លើកដំបូងរបស់សភាជាតិថ្មី នីតិកាលទី ៤ នាថ្ងៃទី២៤ កញ្ញាខាងមុខនេះ ។

លោក ងួន ញ៊ិល មន្រ្តីជាន់ខ្ពស់របស់ គណបក្សប្រជាជនកម្ពុជា ដែលជាអ្នកឈ្នះឆ្នោតបានគូសបញ្ជាក់ថា ព្រះរាជវត្តមាន របស់ព្រះមហាក្សត្រក្នុងសម័យប្រជុំលើកដំបូងរបស់សភាថ្មីនីតិកាលទី ៤ គឺជាមហាកិតិ្តយសមួយសំរាប់សភាជាតិ ។ គណបក្សប្រឆាំងក៏បានយល់ស្របដែរថា ព្រះរាជវត្តមានរបស់ព្រះមហាក្សត្រនាឱកាសនោះ គឺចាំបាច់ខ្លាំងណាស់ ។ ពួក គេអះអាងបែបនេះ បន្ទាប់ពីបានគំរាមធ្វើពហិការ ពុំចូលរួមក្នុងពិធីបើកសម្ភោធសភាថ្មីមក ។ លោក គង់ គាំ អនុប្រធាន គណបក្សសម រង្ស៊ី បាននិយាយថា ព្រះរាជវត្តមានរបស់ព្រះមហាក្សត្រ ធ្វើឱ្យសភាពការណ៍ជាតិទាំងឡាយ មានស្ថិរភាពជា និច្ច និង ថា ប្រជារាស្ត្រ កម្ពុជា និង គណបក្សនយោបាយទាំងឡាយគោរពជានិច្ច និង ចង់ឱ្យមានព្រះរាជវត្តមានរបស់ព្រះ មហាក្សត្រក្នុងពិធីនោះ ។ ព្រះរាជវត្តមានរបស់ព្រះមហាក្សត្រពិតជាសំខាន់បំផុត និង ស្ថិរភាពជាតិ ។ អ្នកវិភាគនិយាយ ថា មិនមានបញ្ហាសំរាប់ការបើកទ្វារសភាថ្មីទេ ។