ថៃ្ងទី១៤ ខែសីហា ឆ្នាំ២០០៨

សម្តេចនាយករដ្ឋមន្រ្តីទទួលជួបអនុរដ្ឋមន្រ្តីក្រសួងការបរទសកូរ៉េខាងត្បូង

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា បានអនុញ្ញាតឱ្យលោក KWON JONG RAK អនុរដ្ឋមន្ត្រីក្រសួងការបរទេស និង ពាណិជ្ជកម្ម នៃ សាធារណរដ្ឋកូរ៉េ ចូលជួយសំដែងការគួរសមនារសៀលថ្ងៃទី១២ ខែសីហា ឆ្នាំ២០០៨ នៅទីស្តីការក្រសួងការបរទេស ក្នុងខណៈដែលលោកអញ្ចើញមកបំពេញទស្សនកិច្ចនៅ កម្ពុជា ។

លោក អ៊ាង សុផល្លែត ជំនួយការ សម្តេចអគ្គមហាសេនាបតីតេជោ បានប្រាប់អ្នកយកព័ត៍មានក្រោយជំនួបនោះថា លោក RAK បានពាំនាំនូវការផ្តាំផ្ញើរសួរសុខទុក្ខពីសំណាក់ឯកឧត្តមប្រធានាធិបតី កូរ៉េខាងត្បូង ជូន សម្តេចនាយករដ្ឋមន្រ្តី ហើយក៏ បានសំដែងនូវការអបអរសាទរយ៉ាងជ្រាលជ្រៅចំពោះជោគជ័យភ្លូកទកភ្លូកដីនៃការបោះឆ្នោតនាពេលកន្លងមកនេះ។

លោកមានប្រសាសន៏ថា ជោគជ័យនេះ គឺបានឆ្លុះបញ្ចាំងនូវជំនឿទុកចិត្តរបស់ប្រជាជន នៅលើការដឹកនាំរបស់ សម្តេចនា យករដ្ឋមន្រ្តី ពិសេសបន្ទាប់ពីបានទទួលជោគជ័យយ៉ាងត្រចះត្រចង់ លើគ្រប់វិស័យសេដ្ឋកិច្ច និង ការអភិវឌ្ឍន៏សង្គមនៅ កម្ពុជា លោកបានផ្តោតក្តីសង្ឃឹមថា រដ្ឋាភិបាលថ្មីរបស់ កម្ពុជា នឹងជំរុញកម្ពុជាឱ្យទទួលេបានជោគជ័យលើគ្រប់វិស័យទាំង អស់ ព្រមទាំងជំរុញ កម្ពុជា ឱ្យមានកិតិ្តស័ព្ទល្បីល្បាញក្នុងឆាកអន្តរជាតិ លោកបន្តថា ប្រទេស កូរ៉េ មានការរីករាយយ៉ាង ខ្លាំងចំពោះទំនាក់ទំនងរវាង កម្ពុជា និង កូរ៉េខាងត្បូង កន្លងមក ដែលក្នុងរយៈពេលតែក្នុង ១ ទស្សវត្យប៉ុណ្ណោះ ទំនាក់ទំនង រវាងប្រទេសទាំងពីរ បានកើតឡើងហើយបានទទួលជោគជ័យជាបន្តបន្ទាប់ ពិសេសវិស័យការទូត និង ការវិនិយោគផង ដែរ ។

លោក RAK ក៏បានអញ្ចើញ សម្តេចតេជោ នាយករដ្ឋមន្រ្តី ដើម្បីចូលរួមនៅក្នុងការប្រារព្ឋខួបទី ២៥ នៃទំនាក់ទំនង កូរ៉េ និង អាស៊ាន ដែលប្រព្រឹត្តនៅប្រទេស កូរ៉េ ខាងមុខនេះ ។

ជាការឆ្លើយតប សម្តេចតេជោ បានថ្លែងអំណរគុណចំពោះការផ្តាំផ្ញើរសាកសួរសុខទុក្ខ និង អបអរសាទររបស់លោក RAK  សម្តេចមានប្រសាសន៏ថា សម្តេចមានមោទនភាពយ៉ាងខ្លាំង ចំពោះទំនាក់ទំនងរវាងប្រទេសទាំងពីរ ជាពិសេសក្នុងរយៈ ពេលដ៏ខ្លីបំផុត ទំនាក់ទំនងរវាងប្រទេសទំាងពីរបានឈានដល់កំរិតមួយ ដែលគួរឱ្យកត់សំគាល់ ហើយមិនត្រឹមតែប៉ុណ្ណោះ ទេ នៅពេលនេះទៀត កូរ៉េ កំពុងតែនាំមុខទៅលើវិស័យចំនួន ៨ នៅប្រទេសកម្ពុជា ។ ពាក់ព័ន្ឋនឹងបញ្ហានេះ សម្តេចតេជោ បានស្មើសុំឱ្យ កូរ៉េ ធ្វើការដឹកនាំលើវិស័យទាំង ៨ នេះបន្តទៀត និង ពិនិត្យមើលសក្តានុពលទាំងឡាយណា ដែល កូរ៉េ អាចធ្វើទៅបានលើវិស័យផេ្សងៗនៅប្រទេស កម្ពុជា ។ សម្តេចនាយករដ្ឋមន្រ្តី ក៏បានស្នើឱ្យប្រទេស កូរ៉េ ពិនិត្យ ជួយដល់ ប្រទេស កម្ពុជា បន្តទៀត ដូចជាការសាងសងអាងចំរុះទឹកនៅខេត្ត សៀមរាប អាងស្តុបទឹកនៅខេត្ត បាត់ដំបង ផ្លូវជាតិ លេខ ៣៣ នៅខេត្ត កំពត ព្រមទាំងស្ពានទាំងឡាយនៅតាមផ្លូវជាតិនានា នៅប្រទេស កម្ពុជា ដើម្បីធ្វើយ៉ាងណាជំរុញ កម្ពុជា ឱ្យឆ្ពោះទៅកាន់ការអភិវឌ្ឍន៏ ។ សម្តេចនាយករដ្ឋមន្រ្តី ក៏បានទទួលយកនូវការអញ្ចើញទៅចូលរួមក្នុងការប្រារព្ឋខួប លើកទី២៥ នៃទំនាក់ទំនង កូរ៉េ និង អាស៊ាន ដែលប្រព្រឹត្តទៅប្រទេស កូរ៉េ ផងដែរ ។

លោក KWON JONG RAK បានមានប្រសាសន៏បន្ថែមទៀតថា លោកនឹងប្រឹងប្រែងឱ្យអស់ពីសមត្ថភាព ធ្វើយ៉ាងណា ឱ្យសំណើរកម្ពុជាទាំងប៉ុន្មានទទួលបានជោគជ័យ ដើម្បីជាកត្តាចំណងមិត្តភាពរវាងប្រទេសទាំងពីរផងដែរ ។