ថៃ្ងទី០៥ ខែកញ្ញា ឆ្នាំ២០០៨

ការអនុវត្តន៍គម្រោងអេកូសន ដែលផ្តល់ថវិការ ដោយមូលនិធិសភាពអឺរ៉ុប

គម្រោងការស្តារឡើងវិញ លើវិស័យសេដ្ឋកិច្ច និង សង្គមកិច្ច នៅបណ្តាខេត្តភាគពាយ័ព្យនៃ ប្រទេសកម្ពុជា ដែលហៅ កាត់ថា គម្រោងអេកូសន បានចាប់ផ្តើមដំណើរការក្នុងឆ្នាំ២០០៦ ក្រោមការ ជួយឧបត្ថម្ភមូលនិធីពិធី សហភាពអឺរ៉ុប ក្នុង គោលដៅកាត់បន្ថយឱ្យបានជាអតិបរមា នូវភាពក្រីក្រក្នុងខេត្តចំនួន ៣ គឺ សៀមរាប បាត់ដំបង និង បន្ទាយមានជ័យ ។ ដោយ ឡែក ខេត្តសៀមរាប គឺ គម្រោងអេកូសន ត្រូវបានអនុវត្តនៅស្រុកចំនួន ៥ រួមមាន ស្រុកស្រទ្រនិគម ស្រុកជីក្រែង ស្រុកអង្គរធំ ស្រុកក្រឡាញ់ និង ស្រុកស្រីស្នំ ។

ជាការឆ្លើយតបទៅនឹងសំណើររបស់ រាជរដ្ឋាភិបាលកម្ពុជា សហភាពអឺរ៉ុប (EU) បានឧបត្ថម្ភនូវជំនួយឥតសំណងជាទឹកប្រាក់ ចំនួន ២៥ លានអឺរ៉ូ ត្រូវជា ៣៩ លានដុល្លារអាមេរិក ដើមី្បគាំទ្រដល់សកម្មភាពអភិវឌ្ឍន៍សម្រាប់រយៈពេលយូរអង្វែង សំដៅកាត់បន្ថយភាពក្រីក្រ នៅក្នុងបណ្តាខេត្តភាគពាយ័ព្យ ទាំងបីក្នុងនោះ រាជរដ្ឋាភិបាលកម្ពុជា ក៏បានរួមចំណែកផងដែរ នូវ ទឹកប្រាក់ចំនួន ១ លានអឺរ៉ូ គឺប្រមាណ ១,៥ លានដុលា្លអាមេរិក ។ គម្រោងអេកូសន ដែលកំពុងអនុវត្តនៅខេត្តទាំង ៣ នោះ បានធ្វើការដោះស្រាយនូវបញ្ហាជាច្រើន លើផ្នែកសង្គមកិច្ច និង សេដ្ឋកិច្ចតាមវិធី ដែលនឹងជួយលើកកំពស់ការអភិវឌ្ឍន៍ ដោយចីរភាពសម្រាប់ប្រជាពលរដ្ឋនៅជនបទ ។

គម្រោងអេកូសន គឺជាគម្រោងដែលអនុវត្តដោយ រាជរដ្ឋាភិបាលកម្ពុជា ក្រោមការដឹកនាំរបស់ រដ្ឋមន្រ្តីក្រសួងកសិកម្ម រុក្ខាប្រ មាញ់ និង នេសាទ ដោយមានកិច្ចសហការពី ក្រសួងធនធានទឹក និង ឧតុនិយម ក្រសួងកិច្ចការនារី និង ក្រសួងរៀបចំដែនដីនគរូ បនីយកម្ម និង សំណង់ ក៏ដូចជាអាជ្ញាធរមូលដ្ឋានផងដែរ ។
 

តាមការឱ្យដឹងពីប្រតិភូ គណៈកម្មការសហគមន៍អឺរ៉ុបប្រចាំកម្ពុជា គឺលទ្ធផលដែលទទួលបានពី គម្រោងអេកូសន រួមមានប្រជា ពលរដ្ឋជាង ១០០០ គ្រួសារ បានទទួលទឹកស្អាត ប្រឡាយទឹក និង សេវាអនាម័យ ។ ប្រជាពលរដ្ឋ ១៥០ ភូមិ មានផ្លូវ ថ្នល់ល្អជាងមុន សម្រាប់ការធ្វើដំណើរ និង ដឹកជញ្ជូនផលិតផលកសិកម្ម ។ បណ្តាញធារាសាស្រ្តចំនួន ៩ កំពុងសាងសង់ សម្រាប់ស្រោចស្រពលើផ្ទៃដីស្រែទំហំជាង ៣០០០ ហិកតា របស់កសិករប្រមាណ ៦៥០០ គ្រួសារ ។ ទន្ទឹមនោះ យុវជន រាប់រយនាក់បានចូលរួមរៀនសូត្រនូវជំនាញថ្មី ដើមី្បរកប្រាក់ចំណូលសម្រាប់ទ្រទ្រង់ការរស់នៅរបស់ខ្លួន រួមជាមួយនឹង ផ្ទៃដីប្រមាណ ២០ ហិកតា នៅក្នុងស្រុកចំនួន ៩ ដែលមានប្រជាពលរដ្ឋរស់នៅប្រមាណ ១៨០០ គ្រួសារ ត្រូវបានសំអាត គ្រាប់មីន ។ ចំណែកប័ណ្ណកម្មសិទ្ធិដីចំនួនជាង ៤០០០ ច្បាប់ ក៏ត្រូវបានផ្តល់ជូនប្រជាពលរដ្ឋប្រមាណ ១៣០០០ គ្រួសារផង ដែរ ។

ឯកឧត្តម ច័ន្ទ សុផល អភិបាលរងខេត្តសៀមរាប បានឱ្យដឹងថា គម្រោងអេកូសន គឺជាគម្រោងមួយ ដែលកើតឡើង ក្រោម កិច្ចសហប្រតិបត្តិការយ៉ាងល្អ រវាងរាជរដ្ឋាភិបាលកម្ពុជា និង សហគមន៍អឺរ៉ុប ដើមី្បចូលរួមចំណែកដល់ការអភិវឌ្ឍន៍វិស័យ សេដ្ឋកិច្ច សង្គមកិច្ច ស្របតាមយុទ្ធសាស្រ្តចតុកោណរបស់ រាជរដ្ឋាភិបាលកម្ពុជា ដែលផ្តោតទៅលើតម្រូវការនៃការអភិវឌ្ឍ ន៍ប្រទេសជាតិ ប្រកបដោយនិរន្តភាព ការកាត់បន្ថយភាពក្រីក្រ និង ការធ្វើឱ្យប្រសើរឡើង នូវជីវភាពរស់នៅរបស់ប្រជា ពលរដ្ឋកម្ពុជា ហើយលោកគាំទ្រទាំងស្រុង នូវគម្រោងដ៏មានសារសំខាន់នេះ ។ ឯកឧត្តមបានបញ្ជាក់ថា គម្រោងអេកូសន នេះ គឺមានរយៈពេល ៥ ឆ្នាំ គិតចាប់ពីខែធ្នូ ឆ្នាំ២០០៥ និង ចំណាយទឹកប្រាក់ប្រមាណ ២៦ លានអឺរ៉ូ ស្មើនឹង ៤០,៥ លាន ដុល្លារអាមេរិក ដែលគិតមកដល់ពេលនេះ មានរយៈពេលជិត ៣ ឆ្នាំហើយ ហើយយើងទទួលបានលទ្ធផលគួរជាទីមោទន ភាពបំផុត ។