ថៃ្ងទី០៤ ខែកញ្ញា ឆ្នាំ២០០៨

សហគមន៏អឺរ៉ុបនាំអ្នកសារព័ត៌មានទៅមើលគម្រោងអភិវឌន៏របស់ខ្លួននៅខេត្ដសៀមរាប

ប្រតិភូ សហគមន៏អឺរ៉ុប ប្រចាំ កម្ពុជា មួយក្រុម ដឹកនាំដោយលោក រ៉ាហ្វាអែល ដូចៅម៉ូរេណូ ដែលជាភារធារី សហគមន៏អឺរ៉ុប ប្រចាំ កម្ពុជា កាលពីចុងសប្ដាហ៏កន្លងមកនេះ បាននាំអ្នកសារព័ត៌មានចំនួន ១០ រូប ចុះពិនិត្យមើលសកម្មភាពជាច្រើន នៃ គម្រោងស្ដារឡើងវិញ លើវិស័យសេដ្ឋកិច្ច និង សង្គមកិច្ចនៅខេត្ដនៃតំបន់ភាគពាយ័ព្យ កម្ពុជា ហៅកាត់ថា អេកូសន ។

គំរោង អេកូសន នេះ ជាគំរោងធំមួយរបស់ សហគមន៏អឺរ៉ុប ដែលចំណាយទឹកប្រាក់ចំនួន ២៥ លានអឺរ៉ូ និង ថវិការបដិភាគ របស់រាជរដ្ឋាភិបាល កម្ពុជា មួយលានអឺរ៉ូក្នុងរយៈពេល ៥ ឆ្នាំ ដោយចាប់ផ្ដើមពីដើមឆ្នាំ ២០០៦ ដល់ឆ្នាំ ២០១០ ដើម្បី ប្រើប្រាស់ លើការអភិវឌ្ឍន៏ភូមិភាគពាយ័ព្យ នៃប្រទេស កម្ពុជា ដែលខេ្ទចខ្ទាំ ដោយសារសង្ក្រាម និង ការរាយប៉ាយនៃ គ្រាប់មីន និង គ្រាប់មីនមិនទាន់ផ្ទុះច្រើនជាងគេ នៅក្នុងដីនៃប្រទេស កម្ពុជា ។ ខេត្ដដែលទទួលបានការអភិវឌ្ឍន៏ នៃគំរោង នេះរួមមានខេត្ដ សៀមរាប បាត់ដំបង និង ខេត្ដ បន្ទាយមានជ័យ ។

លោក ចាន់ សារុទ្ឋ នាយកគម្រោង អេកូសន ថ្នាក់ជាតិបានមានប្រសាសន៏ឱ្យដឹងថា គំរោងនេះ មានការសហការចូលរួមពី ក្រសួងចំនួន ៦ នៃរាជរដ្ឋាភិបាល កម្ពុជា រួមមានក្រសួងកសិកម្មរុក្ខាប្រមាញ់ និងនេសាទ ក្រសួងអភិវឌ្ឍន៏ជនបទ ក្រសួង ធនធានទឹក និងឧតុនិយម ក្រសួងមហាផៃ្ទ ក្រសួងកិច្ចការនារី និង ក្រសួងដែនដីនគររូបនីយកម្ម និងសំណង់ ។ លោកបាន បន្ដទៀតថា គោលដៅនៃគំរោងនេះ គឺចូលរួមចំណែកកាត់បន្ថយភាពក្រីក្រ តាមរយៈការបង្កើនផលិតកសិកម្ម និង បង្កើន អំណាចដល់សហគមន៏មូលដ្ឋាន ។

គំរោងនេះក៏ផ្ដោតផងដែរ ចំពោះការអភិវឌ្ឍន៏វិស័យសេដ្ឋកិច្ច និង សង្កមកិច្ច ដល់កសិករជាលក្ខណៈខ្នាតតូច និង គ្រួសារ របស់គេ ដែលរស់នៅក្នុងតំបន់គោលដៅរបស់គម្រោង ដើម្បីធានាសមធម៌រវាងបុរស និង នារី ។ លោក ចាន់ សារុទ្ឋ ក៏ បានបន្ដទៀតថា លទ្ឋផលរំពឹងទុកចំនួន ៥ ត្រូវបានដាក់ចេញរួមមានទី ១ ធ្វើប្រពលវប្បកម្មពិពិធកម្ម និង បង្កើនផលិតកម្ម កសិកម្មបសុសត្វ និង ជលផលទី ២ បង្កើនកាលានុវត្ដន៏ភាពសេដ្ឋកិច្ច និងឱកាសការងារ ទី ៣ ផ្ដល់អំណាចដល់សហគមន៏ មូលដ្ឋាន ទី ៤ ធ្វើឱ្យប្រសើរឡើង នូវលទ្ឋភាពប្រើប្រាស់សេវាសង្គមជារូបវ័ន្ដទីផ្សារ និង ទឹកស្អាត ទី ៥ គឺការប្រើប្រាស់ ដីធ្លីសម្រាប់ដាំដុះ និង ហេដ្ឋារចនាសម្ព័ន្ឋសង្គម ប្រកបដោយសុវត្ថិភាព និង ជាអចិន្ដ្រៃយ៏ ។

យោងតាមរបាយការណ៏ នៃគំរោង អេកូសន បានបង្ហាញថា ការអនុវត្ដន៏គម្រោងនេះ ធ្វើឡើងក្នុងស្រុកចំនួន ១៤ ឃុំចំនួន ៤០ និង ភូមិចំនួន ៩០ ក្នុងខេត្ដទាំងបី។ លទ្ឋផលសំខាន់ៗ ដែលចាប់ផ្ដើមពីខែធ្នូ ឆ្នាំ២០០៥ មកទល់ពេលនេះ គឺប្រជាជន ប្រមាណ ១៥០ ភូមិ មានផ្លូវថ្នល់ល្អជាងមុនសំរាប់ការធ្វើដំនើរ និង ដឹកជញ្ជូនកសិផលផលិតកម្ម បណា្ដញធារាសាស្ដ្រ ចំនួន ៥ កំពុងសាងសង់សំរាប់ស្រោចស្រពផ្ទៃដីស្រែប្រាំងប្រមាណ ៣០០០ ហិកតា របស់កសិករប្រមាណ ៦៥០០ គ្រួ សារ ។

របាយការណ៏ដដែលបានបង្ហាញថា គំរោងនេះក៏ផ្ដល់ការងារឱ្យយុវជនជាច្រើនរយនាក់បានទទួលនូវជំនាញថ្មីៗ សំរាប់រក ប្រាក់ចំនូលជួយទ្រទ្រង់ការរស់នៅរបស់ខ្លួន ផ្ទៃដីជាង ២០ ហិកតា នៅក្នុងស្រុកចំនួន ៩ មានប្រជាជនជាង ១៨០០ គ្រួ សារ រស់នៅត្រូវបានសម្អាតគ្រាប់មីន ស្រុកទាំងនោះរួមមាន ស្រុកគាល់ក្រឡ មោងឬស្សី រតនមណ្ឌល បង្វិល ស្វាយចេក អង្គរធំ ជីក្រែង និង ស្រុកសូទ្រនិគម ។ ផ្ទៃដីដែលនិងត្រូវសម្អាតមីនមានជាង ៤០០ ហិកតា ។ ផ្ដល់ប័ណ្ឌកម្មសិទ្ធដីចំនួនជាង ៤០.០០០ ច្បាប់នឹងត្រូវផ្ដល់ជូនប្រជាជនប្រមាណ ១៣.០០០ គ្រួសាររស់នៅក្នុង ស្រុកបង្វិល មោងឬស្សី ព្រះនេត្រព្រះ ថ្មពួក ជីក្រែង សូទ្រនិគម និង ស្រុកឡ្រាញ់ ។

ដោយផ្ដោតលើនិរន្ដរភាពនៃជំនួយរបស់ខ្លួន លោក ចាន់ សារុទ្ធ បានមានប្រសាសន៏ឱ្យដឹងថា គំរោង អេកូសន និង ផ្ទេរភារ កិច្ចទទួលខុសត្រូវដល់ កម្ពុជា ខ្លួនឯង តាមរយៈយន្ដការសំខាន់ៗចំនួន ៥ ចំនុច រួមមាន ទី១ ដើម្បីផ្ដល់នូវភាពជាម្ចាស់ និង និរន្ដរភាព ការងារដល់មន្ដ្រីក្នុងស្រុក ទី ២ លក្ខខណ្ឌការងាររបស់បុគ្គលិកក្នុងស្រុក ត្រូវបានរៀបចំកែសម្រួលទៅតាមរចនា សម្ព័ន្ធថ្មី ទី ៣ ផ្ទេរការទទួលខុសត្រូវពីអ្នកជំនាញបរទេសមកបុគ្គលិកក្នុងស្រុក ចាប់អនុវត្ដន៍ពីខែកញ្ញាឆ្នាំ ២០០៨ នេះតទៅ ទី ៤ អ្នកជំនាញបរទេសដែលមិនទាន់ចប់អាណត្ដិការងារ ជាអ្នកជួយពង្រឹងសមត្ថភាពជាបណ្ដើរៗ តាមរយៈការអនុវត្ដន៍ ជាក់ស្ដែង លើការងាររហូតដល់ចប់អាណាត្ដិដើមឆ្នាំ២០០៩ និង ទី ៥ បុគ្គលិកក្នុងស្រុកនិងមានសមត្ថភាពបន្ដការងារបាន បន្ទាប់ពីបញ្ចប់អាណត្ដិការងាររបស់អ្នកជំនាញការបរទេស ។

កាលពីចុងសបា្ដហ៍កន្លងមកនេះ ក្រុមអ្នកសារព័ត៍មានបានទស្សនាសកម្មភាពដោះមីននៅភូមិ ខ្វាវ ស្រុក ជីក្រែង ទស្សនា អណ្ដូងទឹកស្អាតនៅភូមិ បែកកាំភ្លើង ស្រុក សូទ្រនិគម និង ទស្សនាប្រព័ន្ធស្រោចស្រពនៅក្នុងស្រុក ក្រឡាញ់ ។

លោក Rafael Dochao Moreno បានមានប្រសាសន៍បន្ទាប់ពីចុះទស្សនកិច្ចគម្រោង អេកូសន ថា បេសកម្មចុះមកកាន់ ខេត្ដ សៀមរាប ដោយប្រតិភូសហគមន៍អ៊ឺរ៉ុប និង អ្នកសារព័ត៍មាន ពិតជាមានសារសំខាន់ណាស់ ដើម្បីពិនិត្យមើលគំរោង អភិវឌ្ឍន៍របស់ខ្លួន ក្នុងការចូលរួមចំណែកពង្រឹងសមត្ថភាពមន្ដ្រី និង អ្នកពាក់ព័ន្ធ សំដៅធ្វើយ៉ាងណា ចូលរួមកាត់បន្ថយ ភាពក្រីក្ររបស់ប្រជាជន កម្ពុជា ។ លោកបន្ដថា មុនគម្រោងនេះចាប់អនុវត្ដ តាមរយៈការសហការជាមួយរាជរដ្ឋាភិបាល កម្ពុជា យើងបានធ្វើការចុះស្រាវជ្រាវ និង អង្កេតតាំងពីបីទៅបួនឆ្នាំមុនគម្រោងបានចាប់ផ្ដើម ។ លោកបន្ដថា អ្វីដែល យើងចុះអង្កេត និង ស្រាវជ្រាវ គឺដើម្បីពិនិត្យមើលពីតម្រូវការរបស់ប្រជាពលរដ្ឋ និង ស្ថានភាពទីតាំងអនុវត្ដគំរោង ដើម្បី ឆ្លើយតបនិងការចង់បានរបស់ប្រជាពលរដ្ឋ ហើយគម្រោងត្រូវបានអនុវត្ដ ដោយអ្នកជំនាញរវាងភាគីទាំងពីរ ។ លោក បន្ថែមថា យើងមានរឿងកំប្លែងមួយ ដែលលោក ចាន់ សារុទ្ធ បានលើកឡើងថា គម្រោងនេះជាប់ឯកទគ្គកម្ម ដោយសារ ចាប់តាំងពីរចាប់ផ្ដើម យើងបានធ្វើសវនកម្មជាប់ជាប្រចាំ ដើម្បីពិនិត្យលើការប្រើប្រាស់ថវិការជំនួយនេះ ព្រោះប្រជាជន នៅអឺរុបពួកគេចង់ដឹងណាស់អំពីរប្រាក់ ដែលគេបង់ពន្ធថា ចាយវាយដោយរបៀបណា ។

លើកឡើងពីការចាកចេញរបស់អ្នកជំនាញការបរទេសនាពេលឆាប់ៗខាងមុខ ដោយប្រគល់ការងារនេះ ឱ្យជំនាញការ កម្ពុជា ទទួលខុសត្រូវអាចនឹងមានហានិភ័យនៃការចាយវាយថវិកានេះ លោក Rafael Dochao Moreno បានគូសបញ្ជាក់ ថា ខ្ញុំគិតថា វាមិនឆាប់ពេកទេ ដែលជំនាញការបរទេសបានចាកចេញ ព្រោះកិច្ចការនេះត្រូវបានគិតតាំងពីចាប់ផ្ដើម ដោយ ធ្វើយ៉ាងណាបង្កើតឱ្យមន្ដ្រីពាក់ព័ន្ធធ្វើភាពជាម្ចាស់ នៃគម្រោងផ្ទេរការទទួលខុសត្រូវ ១០០ ភាគរយ នៃគម្រោងនេះដល់ មន្ដ្រីថា្នក់ជាតិ និង អ្នកពាក់ព័ន្ធទាំងឡាយ ។

ដោយទទួលស្គាល់ថា ការងារនេះមានលក្ខណៈស្មុគស្មាញច្រើន ប៉ុន្ដែលោក Rafael Dochao Moreno បានមានប្រសាស ន៍ថា វាជានិមិត្ដរូបមួយរបស់ក្រសួងកសិកម្ម ដែលដឹកនាំគម្រោងបានល្អបែបនេះ ហើយវាប្រៀបបាននឹងវង់ភ្លេងមួយ ដែលមានឧបករណ៍ច្រើន ប៉ុន្ដែមានការប្រគុំយ៉ាងល្អ និង ប៉ិនប្រសព្វ ដោយលោក ចាន់ សារុទ្ធ ដើម្បីជាការបន្លឺសំឡេង ភ្លេងនេះ ដល់រដ្ឋាភិបាលក៏ដូចជា ម្ចាស់ជំនួយផ្សេងៗទៀត យកគំរូតាមអ្វី ដែលយើងបានកំពុងអនុវត្ដ ។

ឯកឧត្ដម ច័ន្ទ សុផល អភិបាលរងខេត្ដ សៀមរាប បានមានប្រសាសន៏ថា គម្រោង អេកូសន ជាគម្រោងមួយដែលកើត ឡើង ក្រោមកិច្ចសហប្រតិបត្ដិការយ៉ាងណាល្អរវាងរាជរដ្ឋាភិបាល កម្ពុជា និង សហគមន៍អឺរុប ដើម្បីរួមចំណែកដល់ការអភិ វឌ្ឍន៍ដល់ភូមិភាគពាយ័ព្យនៃប្រទេស កម្ពុជា ។ ការអនុវត្ដគម្រោង អេកូសន រហូតមកដល់ពេលនេះ នៅតាមបណ្ដាស្រុក គោលដៅទាំង ៥ របស់ខេត្ដ សៀមរាប បាននិងកំពុងទទួលការចូលរួមពីគ្រប់ស្ថាប័ន និង អង្គភាពពាក់ព័ន្ធនានា ដែលមកពី ស្ថាប័នរដ្ឋសង្គមស៊ីវិល និង ផ្នែកឯកជនព្រមទាំងប្រជាពលរដ្ឋក្នុងតំបន់គោលដៅរបស់គម្រោង លើការអនុវត្ដកម្មវិធី អភិវឌ្ឍន៍ជនបទចម្រុះ ដោយទទួលបានផ្លែផ្កាគួរជាទីមោទនៈ ។

លោកបន្ដដោយគូសបញ្ចាក់ថាគម្រោង អេកូសន ដែលបាននិងកំពុងអនុវត្ដគឺស្របតាមយុទ្ធសាស្ដ្រចតុកោណរបស់រាជរដ្ឋា ភិបាលកម្ពុជា ដែលផ្ដោតទៅលើតម្រូវការ នៃការអភិវឌ្ឍន៍ប្រទេសជាតិ ប្រកបដោយនិរន្ដភាព កាត់បន្ថយភាពក្រីក្រ និងធ្វើ ឱ្យប្រសើរឡើង នូវជីវភាពរស់នៅរបស់ប្រជាជន កម្ពុជា ។