ថៃ្ងទី០២ ខែកញ្ញា ឆ្នាំ២០០៨

ព្រឹត្ដការណ៏សំខាន់ៗទាក់ទងនឹងស្ថានភាពនៅប្រទេសថៃ

ទាក់ទងនឹងព្រឹត្ដការណ៏សំខាន់ៗទាក់ទងនឹងស្ថានភាពនាពេលបច្ចុប្បន្ននេះលោកនាយក រដ្ឋមន្ដ្រីថៃ សាម៉ាក់ ស៊ុនដារ៉ាវេច បានប្រកាសភាពអាសន្ននៅទីក្រុងបាងកក កាលពីព្រឹកមិញនៅវេលាម៉ោង ៧​:០០ ព្រឹក ថ្ងៃទី០២ ខែកញ្ញា ឆ្នាំ២០០៨ បន្ទាប់ពីមានការប៉ះទង្កិចគ្នា រវាងក្រុមអ្នកគាំទ្ររដ្ឋាភិបាល និង ក្រុមប្រឆាំងនិងរដ្ឋាភិបាលកាលពីម៉ោង ២​:០០ ព្រឹក ថ្ងៃទី ០២ ខែកញ្ញា ឆ្នាំ២០០៨ ។

ដោយឡែកចំពោះក្រុមសម្ព័ន្ឋប្រជាជន ដើម្បីលទ្ឋិប្រជាធិបតេយ្យបានប្ដេជ្ញាថា នឹងនៅតែបន្ដធ្វើការទាមទារនៅក្នុងវិមាន រាជរដ្ឋាភិបាលថៃ ។ ជុំវិញសាច់រឿងនេះដែរ មានមេដឹកនាំ លោក ចាំឡុង ស្រ៉ីមឿង បាននិយាយទៅកាន់ពួកបាតុករថា ពួក យើងទាំងអស់គ្នា នៅតែបន្ដធ្វើការទាមទារជាបន្ដទៅទៀត ។ អ្វីដែលរដ្ឋាភិបាលអាចធ្វើនោះ គឺចាប់ខ្លួនពួកមេដឹកនាំសំ ខាន់ៗរបស់គណបក្សសម្ព័ន្ឋប្រជាជនដើម្បីលទ្ឋិប្រជាធិបតេយ្យ រដ្ឋាភិបាលគ្មានគុកគ្រប់គ្រាន់សំរាប់ដាក់ពួកយើងទេ ។ លោកថែមទាំងបន្ថែមទៀតថា គណបក្សទាំងអស់បានធ្វើការប្រមានរដ្ឋាភិបាល ហើយថាបើសិនចែងច្បាប់យ៉ាងនេះ ពួក គេនឹងមិនឱ្យរដ្ឋាភិបាលកាន់កាប់អំណាចទៀតទេ ។

ឯកឧត្ដម សាម៉ាក់ ស៊ុនដារ៉ាវេច បានបញ្ជាឱ្យឧត្ដមសេនីយិ៍ អានុភុង ផៅចិន្ដា ទទួលខុសត្រូវលើបញ្ហានេះ ។ គាត់ឥឡូវនេះ មានអំណាចដូចជា ៖

-ចាប់ឃាត់ខ្លួន និង បំបែកហ្វូងប្រជាជន

-ធ្វើការពង្រាយទ័ព

-ហាមឃាត់មិនឱ្យប្រជាជនប្រមូលផ្ដុំមនុស្សលើសពី ០៥ នាក់

-អ្នកដឹកនាំសម្ព័ន្ឋប្រជាជនដើម្បីលទ្ឋិប្រជាធិបតេយ្យ បានប្រាប់ឱ្យអ្នកគាំទ្ររបស់របស់ខ្លួន នៅភាគខាងត្បូងឱ្យបិទព្រ លានយន្ដហោះនៅ ហាត់យៃ និង ភូកេត ។

ជាមួយគ្នានេះដែរ ទាហានក៏បានធ្វើអន្ដរាគមន៍កាលពីព្រឹកព្រលឹមថ្ងៃអង្គារ បន្ទាប់ពីពួកក្រុមគាំទ្ររដ្ឋាភិបាលវាយប្រហារ លើពួកក្រុមប្រឆាំងដែលកាន់កាប់វិមានរដ្ឋាភិបាល និង មានក្រុមប្រឆាំងស្លាប់យ៉ាងតិច ១ នាក់ និង មានមនុស្សចំនួន ២១ នាក់ រងរបួស ។ លោក សាធិ វង្សនុងតើយ សមាជិកសភាមកពីគណបក្សប្រជាធិបតេយ្យ បាននិយាយថា សេចក្ដីប្រ កាសភាពអាសន្ននោះ ធ្វើឱ្យលោក សាម៉ាក់ អាចក្ដោបស្ថានការណ៏បាន ។

បន្ទាប់ពីមានការប៉ះទង្កិចគ្នា រវាងក្រុមអ្នកគាំទ្ររដ្ឋាភិបាល និង ក្រុមអ្នកប្រឆាំងរដ្ឋាភិបាលថៃ កងទ័ពចំនួន ៤០០ នាក់ ត្រូវ បានបញ្ជាឱ្យចូលទៅកាន់កន្លែងកើតហេតុ ដើម្បីជួយស្ដារនូវសន្ដិភាពឡើងវិញ ហើយបនា្ទប់ភ្លាមមកនោះ គូបដិបក្ស ទាំងពីរបានដកខ្លួនចេញ ចំនែកឯកឧត្ដមសេនីយ៏ ប៊ូនសាង នាមប្រាឌីត អគ្កបញ្ជាការកងទ័ពថៃបានថ្លែងថា ស្ថានភាពនៃការ ប្រកាសអាសន្ននៅក្រុង បាងកក ថ្ងៃនេះ អាចដោះស្រាយបញ្ហាមួយចំនែក ។ ចំនែកឯលោក ពាន យុងនុ មេដឹកនាំ សហជីពកម្មករ អាជ្ញាធរអគ្កីសនីរាជធានីបាងកក បានអំពាវនាវដល់ឧត្ដមសេនីយ៏ អនុភុង ផៅចិន្ដា ដោយដាក់លក្ខខណ្ឌ ៣ យ៉ាង ដើម្បីដោះស្រាយជំលោះនេះ ទីមួយស្នើឱ្យលោក សាម៉ាក់ ចុះចេញពីអំណាច ទីពីរគឺឱ្យរំលាយរដ្ឋសភា ទីបីគឺតំរូវឱ្យ មាន រដ្ឋាភិបាលយោធា ។ ហើយលោក ពាន ដដែលនេះបានគំរាមថា ប្រសិនបើសហជីពពុំបានទទួលចំលើយនោះទេ ខ្លួន នឹងកាត់ ផ្ដាច់អគ្កីសនីនៅក្រសួងការពារជាតិនៅថ្ងៃស្អែក ។